(Видео) Тројца рудари спасени од Трепча, уште 60 се заробени под земја

Тројца рудари се спасени од рудникот Трепча во Старо Трг, додека уште 60 рудари остануваат заробени на 11. хоризонт. Пожарникарите продолжуваат со активностите за нивно извлекување, пренесува српскиот Телеграф.

Претседателот на Синдикатот на рударите на Трепча, Ибрахим Јанузи, изјави дека рударите останале заглавени поради дефект во електроенергетскиот систем. Според него, проблемот настанал околу 19:30 часот, по палење на високонапонски водови и дефект на трансформаторската станица кај првиот тунел.

— реклама —

Јанузи информираше дека дел од рударите почнале да излегуваат преку алтернативни излези. Со рударите има комуникација преку индуктивна телефонска линија, а нивната состојба засега е стабилна.

Тој додаде дека е пријавено оти еден од рударите има проблем со ногата, што може да му го отежне излегувањето пеш.

— реклама —

Според информациите од теренот и комуникацијата со раководството, електричната линија што го снабдува рудникот нема поголеми оштетувања и може да биде поправена за кратко време. Јанузи посочи дека проблемите во делот на флотацијата не го попречуваат извлекувањето на рударите, бидејќи тој систем не е поврзан со лифтот што се користи за нивен транспорт од рудникот.

— реклама —

Претседателот на Синдикатот го критикуваше недостигот од инвестиции и застарената опрема, посочувајќи дека слични ситуации се повторувале и претходно.

Според него, недостатокот на алтернативно снабдување со електрична енергија доведува до тоа рударите со часови да остануваат заробени под земја, што, како што оцени, претставува опасност за нивниот живот и здравје.

— реклама —