(Видео) Владата на СДСМ и ДУИ уште во 2023 година одобрила деловни односи со Алта банка на Мацура, тогаш не бил ли руски капитал?, праша Мицкоски во Собрание

Премиерот Христијан Мицкоски, на надзорната расправа за „Алта банка“ во Собранието, обвини дека токму претходната Влада на СДСМ и ДУИ уште во 2023 година дала насока за воспоставување деловни односи со банката поврзана со Давор Мацура, чиј капитал денес опозицијата го доведува во прашање.

Според Мицкоски, на владина седница во 2023 година, на предлог на тогашниот министер за финансии Фатмир Бесими, било одобрено Државното правобранителство да постапува во врска со продажбата на акциите што државата ги поседувала во банка која ја купувал Мацура

— реклама —

„И уште во 2023 година владата на СДСМ и ДУИ на владина седница му дала насока на правобранителството државно да влезе во деловни односи со Алта банка со истиот овој сопственик, Давор Мацура“, рече Мицкоски пред пратениците.

Тој постави прашање дали тогашните владини функционери знаеле кој е Мацура и дали и во тој период имале сомнежи за потеклото на капиталот.

„Тука се поставува прашањето дали тие тогаш знаеле кој е Давор Мацура или, кога се одлучиле акциите коишто ги поседува државата во банката којашто ја купува Давор Мацура да му ги продадат. Велат дека имале претстава дека тоа се руски капитал, прљави пари, криминално стекнати пари, или тогаш тоа не важело“, изјави премиерот.

— реклама —

Мицкоски посочи дека на седницата присуствувале тогашниот премиер Димитар Ковачевски, министерот за внатрешни работи Оливер Спасовски, министерот за земјоделство Љупчо Николовски, министерот за транспорт и врски Благој Бочварски и други членови на Владата.
Тој тврди дека сите тие гласале за одлуката поврзана со отуѓувањето на државните акции

„Каков е тој тогаш капитал? Каков е тој тогаш капитал? Дали тој тогаш капитал е поинаков?“, праша Мицкоски.

— реклама —

Премиерот ја обвини опозицијата за двојни стандарди, поврзувајќи ги сегашните критики за банката со одлуките што, според него, ги носела претходната влада.

„Дали тогаш Александар Вучиќ не бил режим и не била банката на Александар Вучиќ којшто го молеа и правеа естрада кога добиваа 5.000 вакцини бидејќи беа неспособни во короната да купат вакцини“, рече Мицкоски.

Тој го заврши овој дел од обраќањето со тврдењето дека токму Владата на СДСМ и ДУИ ја вовела државата во деловни односи со банката поврзана со Мацура.

— реклама —

„Јас навистина сум вчудоневиден, но сакам македонската јавност ова јасно да го знае, дека Македонија како држава во деловни односи со Алта банка на Мацура ја носи владата на СДСМ и ДУИ на предлог на тогашниот министер Фатмир Бесими“, изјави Мицкоски.