Во заедничка меѓународна полициска акција на македонската полиција, Американската дипломатска безбедносна служба (ДСС) и безбедносните органи на Албанија, во албанскиот град Драч се уапсени двајца припадници на организираната криминална група „Беланоца“.
Од Министерството за внатрешни работи информираат дека станува збор за едно лице родено во Скопје, и лице родено во Норвешка, по кои Интерпол имал распишано меѓународни потерници.
Тие се барале поради сомнение за сторени кривични дела „убиство“, „убиство во обид“, „тешка телесна повреда“, „недозволено изработување, држење и тргување со оружје или распрскувачки материи“ и „злосторничко здружување“.
При нивното приведување биле пронајдени фалсификувани лични документи, за кои постои сомнение дека ги користеле за да ја напуштат државата и да ја избегнат кривичната одговорност.
Од МВР посочуваат дека акцијата е резултат на повеќемесечна координација и размена на информации меѓу македонската полиција, Американската дипломатска безбедносна служба (ДСС) и безбедносните институции на Република Албанија.
