(Видео) Во куфер на аеродром во Келн откриени 37 отровни змии и 55 гуштери

Необичен обид за шверц бил откриен на аеродромот Келн-Бон, каде што германските цариници во куфер на 45-годишен мексикански пожарникар пронашле вкупно 92 змии и гуштери, меѓу кои и отровни видови.

Мажот предизвикал сомнеж кај службениците бидејќи бил „забележително нервозен“ додека минувал низ зелениот коридор, наменет за патници кои немаат стока за пријавување, објави Би-Би-Си.

— реклама —

Цариниците најпрво го тестирале за присуство на дрога. Откако тестот покажал позитивен резултат за кокаин, го прегледале и неговиот куфер. Иако во багажот не пронашле наркотици, откриле шокантна содржина: змии и гуштери скриени во шишиња од шампон и креми, пластични садови и завиткани чорапи.

Меѓу животните имало 37 живи отровни змии и 55 гуштери, вклучувајќи шарки, ѕвечарки, игуани и други видови.

— реклама —

„Моите колеги на аеродромот се навикнати на секакви изненадувања кога станува збор за сувенири во куферите, но досега немавме случај со 37 живи отровни змии и 55 гуштери од Мексико“, изјави Јенс Аланд, портпарол на царинската управа во Келн.

Тој додаде дека дел од животните биле превезувани во нехумани услови, а некои угинале за време на патувањето од Мексико Сити, преку Истанбул.

— реклама —

Мажот, чиј идентитет не е објавен, им рекол на службениците дека ги пренесувал животните како услуга за познаник од Бразил. Му бил забранет влез во Германија и бил вратен со лет за Истанбул.

Животните што го преживеале патувањето биле згрижени во фарма за змии во Германија.

Од германската царина соопштиле дека минатата година на национално ниво биле спроведени повеќе од 1.300 заплени поврзани со над 56.600 заштитени животни и растенија или производи изработени од нив.

Сличен случај на истиот аеродром бил откриен и пред шест години, кога цариниците пронашле 26 ретки влекачи скриени во пакувања со играчки и слатки од Мексико. Десет од животните биле угинати, а преостанатите биле наменети за приватни купувачи во Германија.