Пожар што избувнал по удар на гром за време на невремето се проширил во близина на Штип, а поради силниот ветер и непристапниот терен огнената стихија брзо зафатила поголема површина и се доближила до населени места.
Градоначалникот на Штип, Иван Јорданов, изјави дека противпожарните екипи веднаш излегле на терен, заедно со доброволни противпожарни друштва, со цел да се спречи ширењето на огнот кон куќи и имоти.
„Нема простор за паника, мобилизирани сме максимално. Искомунициравме со ЦУК и Дирекцијата за заштита и спасување. Очекуваме во текот на ноќта да пристигне дополнителна помош и да се направи заштитен обрач за да нема ширење на огнот и зафаќање на куќи и имот кој е во непосредна близина“, рече Јорданов.
Според него, пожарот настанал по удар на гром за време на невремето што го зафати регионот.
„Направен е терен за дополнителни возила да доставуваат вода за гаснење. Се надевам дека ноќеска целосно ќе биде локализиран пожарот. Искомуницирани се неколку доброволни друштва, разговарав и со колегите од Кавадарци и Свети Николе. Очекувам поддршка во текот на ноќта“, додаде градоначалникот.
Тој посочи дека во овој момент не може да се процени колкава е штетата и колкава површина е зафатена од огнот, нагласувајќи дека најважно е да не бидат загрозени домовите и безбедноста на граѓаните.
На терен се ангажирани пожарникари, доброволци и механизација, а надлежните служби ја следат состојбата и во текот на ноќта.
