(Видео) Хаос на проба за парада во Рим: Полициски службеник активирал пиротехника без дозвола, 35 коњи избегале

Неовластено активирање на пиротехнички средства за време на проба за парадата по повод Денот на Републиката во Италија предизвикало вистински хаос во Рим, откако десетици исплашени коњи се разбегале низ главниот град, а неколку јавачи биле повредени.

Според информациите од италијанската полиција, инцидентот се случил во петокот околу 23:30 часот, кога сообраќаен полицаец активирал пиротехнички средства без претходно одобрение во близина на местото каде што се одржувала пробата.

— реклама —

Силните детонации ги исплашиле церемонијалните коњи, од кои дел биле јавани, а дел биле водени од припадници на безбедносните сили. Околу 35 коњи избегале и излегле на една од прометните улици во Рим.

Последниот коњ бил пронајден дури во раните утрински часови, на околу 14 километри од местото на настанот.

— реклама —

Во паниката неколку јавачи паднале од седлата. Најтешко повреден е 22-годишен војник, кој се здобил со скршени ребра и прободено белодробно крило, но неговиот живот не е во опасност.

— реклама —

Повредени биле и околу петнаесет коњи, но според надлежните служби, ниту едно животно не било во состојба што би наложила евтаназија.

Командантот на римската полиција, Марио Де Склавис, изјавил дека инцидентот сериозно го нарушува угледот на полицискиот корпус и неговите припадници.

Пробата се одржувала во близина на античките Каракалини бањи, каде што коњичките единици на италијанската војска, карабињерите и полицијата се подготвувале за традиционалната парада што ќе се одржи на 2 јуни по повод Денот на Републиката. Според истрагата, пиротехничките средства биле активирани на околу 200 метри од местото каде што се наоѓале коњите.