Претседателката на Либерално-демократската партија (ЛДП) и пратеничка во Собранието, Моника Зајкова, ги повика пратениците да ги поддржат техничките измени на Изборниот законик, предупредувајќи дека во спротивно Македонија може да ги изгуби првите четири милиони евра од Европската Унија.
„Изборот на Парламентот денеска е едноставен – дали ќе ги изгласаме само техничките забелешки на ОБСЕ и ОДИХР или ќе дозволиме граѓаните да изгубат четири милиони евра. Никој разумен политичар не би дозволил граѓаните да останат без тие средства“, изјави Зајкова.
Таа потсети дека ЛДП уште минатата недела побарала измените што се однесуваат исклучиво на препораките на ОБСЕ и ОДИХР веднаш да бидат ставени во собраниска процедура.
Според Зајкова, не станува збор за политички „црвени линии“, туку за технички измени што веќе се договорени и чие усвојување е поврзано со добивањето средства од Европската Унија.
„До 2028 година има доволно време политичките партии да ги усогласат останатите прашања поврзани со Изборниот законик. Сега е важно да ги усвоиме техничките забелешки и да им обезбедиме четири милиони евра на граѓаните“, порача Зајкова.
