Германија повлече од продажба замрзнато овошје произведено во Србија, откако во пратката бил откриен вирус на хепатитис А, објави Европскиот систем за брзо предупредување и известување за храна (RASFF).
Според известувањето, станува збор за мешавина од замрзнати бобинки што содржела малини и капини од Србија, како и јагоди, црвени и црни рибизли и диви боровинки од Полска. Ризикот за здравјето на потрошувачите е означен како „сериозен“.
Српското Министерство за земјоделство соопшти дека производител на пратката е Фриго-Паун од Пожега.
Германските власти и минатата година открија присуство на хепатитис А кај малини од Србија. Според експертите, вирусот најчесто е поврзан со недоволна хигиена при производство и ракување со храната.
Хепатитис А е вирусно заболување што го напаѓа црниот дроб, а најчестите симптоми се замор, гадење, температура, болки во стомакот и жолтица. Симптомите обично се појавуваат две до шест недели по изложеноста на вирусот.
