Соочени со екстремно високи температури, здравствените власти објавија низа препораки за заштита на населението, предупредувајќи дека топлотните бранови можат сериозно да го загрозат здравјето, особено кај најранливите категории граѓани.
Најизложени на ризик се малите деца, повозрасните лица, бремените жени, лицата со прекумерна телесна тежина, како и хронично болните, особено оние со срцеви и респираторни заболувања и дијабетес.
Дополнителен ризик имаат и лицата кои работат или вежбаат на отворено, како и оние кои престојуваат во непроветрени и недоволно разладени простории.
Според стручните лица, високите температури можат да предизвикаат влошување на респираторните заболувања, пад на крвниот притисок, дехидратација, тромбоза, срцев и мозочен удар. Дополнително, изложеноста на силно сончево зрачење може да предизвика изгореници, предвремено стареење на кожата и да го зголеми ризикот од рак на кожата.
Здравствените власти предупредуваат и на опасноста од хипертермија, односно прегревање на организмот, што може да доведе до топлотна исцрпеност или топлотен удар – состојба која бара итна медицинска помош.
На граѓаните им се препорачува да избегнуваат изложување на директно сонце во периодот од 10 до 17 часот, особено децата, бремените жени, постарите лица и хронично болните.
Се советува носење лесна и широка облека од природни материјали, капа или шешир со широк обод и очила за сонце со УВ-заштита.
Лицата кои мора да работат на отворено треба почесто да прават паузи, да престојуваат во сенка и редовно да внесуваат течности. Препораките се да се пијат доволно количини вода и нискокалорични пијалаци без кофеин, алкохол и шеќер, како и да се консумираат полесни и почести оброци.
Дополнително, се препорачува просториите во кои престојуваат деца, постари лица и хронично болни да бидат соодветно разладени, при што температурата во текот на денот не треба да надминува 30 степени Целзиусови.
Здравствените власти апелираат граѓаните доследно да ги почитуваат препораките сѐ додека траат високите температури.
