Поради најавените високи температури, Министерството за здравство, врз основа на препораките на Институтот за јавно здравје, апелира до граѓаните да ги почитуваат мерките за заштита од топлото време со цел да се избегнат здравствени последици.
Од Министерството препорачуваат граѓаните да избегнуваат директно изложување на сонце и престој на отворено во периодот од 11:00 до 17:00 часот, кога температурите се највисоки.
При престој на отворено се советува носење лесна и светла облека, како и заштитни очила и капа со широк обод. Доколку престојот на отворено е неопходен, граѓаните треба почесто да одмораат во сенка и да избегнуваат директно изложување на сончевите зраци.
Се препорачува престој во затворени и климатизирани простории, како и затворање на прозорците и ролетните во текот на денот, а нивно отворање во вечерните часови кога температурите се пониски.
Здравствените власти советуваат и умерен внес на храна, со избегнување на масна, висококалорична и премногу засладена храна. Особено е важно во текот на целиот ден да се внесуваат доволно течности, без да се чека појава на чувство на жед. Најдобар избор е водата, додека треба да се избегнуваат алкохолни пијалаци, пијалаци со кофеин и премногу ладни напивки.
Од Министерството потсетуваат дека целосно затворените возила можат брзо да достигнат екстремно високи температури, поради што никогаш не треба да се оставаат луѓе или деца во паркиран автомобил.
За разладување се препорачува туширање со млака вода, користење ладни облоги или потопување на стапалата во ладна вода.
Посебна внимателност треба да посветат лицата со хронични заболувања, особено пациентите со кардиоваскуларни, невролошки и белодробни болести, кои треба редовно да ја земаат препишаната терапија и за секоја промена на здравствената состојба да се консултираат со својот матичен лекар.
