СДСМ обвини дека Владата ги довела во незавидна положба пациентите кои боледуваат од астма и хронична опструктивна белодробна болест (ХОББ), тврдејќи дека лекот „Фостер“ значително поскапел, додека ветената бесплатна генеричка замена сè уште не е достапна во аптеките.
Од партијата наведуваат дека Фондот за здравствено осигурување ја зголемил цената на лекот од околу 300 на 1.080 денари, што, според нив, претставува дополнителен товар за пациентите кои зависат од секојдневната терапија.
СДСМ тврди дека како замена бил најавен бесплатен генерички лек, но дека, според информациите со кои располага партијата, тој сè уште не може да се најде во аптеките.
Од опозициската партија оценуваат дека ваквата состојба сериозно го загрозува здравјето на хронично болните пациенти, бидејќи редовното користење на терапијата е неопходно за контрола на болеста.
Во соопштението СДСМ потсетува и на, како што наведува, минатогодишните проблеми со недостигот на биолошка терапија за онколошките пациенти, оценувајќи дека здравствениот систем се соочува со сериозни проблеми.
Партијата побара итно обезбедување на неопходната терапија за сите пациенти и повика надлежните да преземат одговорност за, како што велат, настанатата состојба.
