Премиерот Христијан Мицкоски изјави дека Владата продолжува со силна поддршка на домашните претприемачи и компании, посочувајќи дека преку кредитната линија, позната во јавноста како „унгарски кредит“, досега се пласирани вкупно 230 милиони евра.
Одговарајќи на новинарски прашања, Мицкоски рече дека само во текот на минатата недела биле префрлени околу 120 милиони денари, а целта на Владата е преку овие средства да се поттикнат нови инвестиции и развој на домашната економија.
„Ние како Влада не само што поддржуваме странски директни инвестиции, туку ги поддржуваме и домашните претприемачи, домашната индустрија и домашната економија. Каматната стапка изнесува 1,95 проценти, со грејс-период од три години и рок на отплата до 12 години. Очекуваме овие средства да генерираат најмалку двојно поголем инвестициски циклус кај домашните компании“, изјави Мицкоски.
Премиерот посочи дека токму ваквата поддршка е една од причините за позитивните резултати во индустријата, која, според него, успеала да се консолидира по мартовските предизвици поврзани со енергетската криза и случувањата на Блискиот Исток.
„Веќе во април консолидираната индустрија бележи значаен раст. Имаме зголемување од 7,4 до 7,5 проценти во споредба со истиот месец минатата година“, нагласи Мицкоски.
Тој оцени дека овие показатели се доказ дека економските политики на Владата даваат резултати, додавајќи дека, и покрај критиките и, како што рече, обидите за создавање паника и ширење невистини, државата се движи во позитивна насока.
„Македонија забрзува и на крајот ќе победи, како што многупати победила и во минатото“, порача премиерот.
