Владата најостро го осуди опожарувањето на возила со дипломатски статус во близина на Амбасадата на Република Бугарија во Скопје, оценувајќи го инцидентот како недозволив вандалски чин и напад врз безбедноста и дипломатските односи.
Во соопштението се наведува дека ваквите постапки претставуваат повреда на принципите на меѓународното право и немаат место во едно демократско општество.
„Секој обид за предизвикување тензии, ширење омраза или нарушување на безбедноста ќе биде максимално санкциониран“, порачаа од Владата.
Надлежните институции, како што се посочува, веќе преземаат интензивни активности за целосно расчистување на случајот и идентификување на сторителите.
Од Владата истакнаа дека државата располага со капацитет да одговори со сите расположливи институционални механизми и нема да дозволи поединци да ја нарушуваат репутацијата на Македонија.
Воедно, се очекува брза и ефикасна истрага, целосно расветлување на настанот и соодветна кривична одговорност за сите инволвирани.
„Остануваме цврсто посветени на заштитата на сите граѓани и дипломатски мисии во земјата, како и на зачувувањето на стабилноста, безбедноста и добрососедските односи“, се наведува во владината реакција.
