Премиерот Христијан Мицкоски изјави дека Владата и најголемите синџири на маркети постигнале согласност да работат на намалување на растот на цените на основните прехранбени производи, со цел во јули годишната инфлација кај храната да биде под три проценти.
„Една од тие цели е да, во јули месец, годишната стапка на промена на цените на основните прехранбени производи не биде поголема од 3%, односно да биде под 3%. Се сложивме сите дека за да се реализира тоа потребно е да направиме еден ваков состанок со производителите, дистрибутерите и добавувачите“, рече Мицкоски.
Тој посочи дека Владата ќе продолжи со разговорите со сите чинители во синџирот на снабдување, со цел да се дојде до пониски цени за граѓаните.
На прашањето што ќе се случи доколку договореното не се почитува, Мицкоски рече дека Владата веќе ги анализира можните чекори и законски решенија.
„Ги анализираме сите објективни состојби што тие вчера ги кажаа, анализираме и промена на одредени законски решенија во насока на поуспешна реализација на оваа цел“, изјави премиерот.
Тој најави и дека Државниот пазарен инспекторат ќе изготви компаративна анализа на цените кај добавувачите и маркетите.
„Државниот пазарен инспекторат доби задача да направи компаративна анализа помеѓу цените на еден ист производ кај добавувачите кон маркетите и цените на маркетите кон потрошувачите, споредувајќи ги податоците од мај 2025 и мај 2026 година“, рече Мицкоски.
Според него, фокусот е ставен исклучиво на основните прехранбени производи, а не на акцизните производи како тутун и алкохолни пијалаци. „Нашата цел е основните прехранбени производи да бидат подостапни за граѓаните“, додаде премиерот.
