Премиерот Христијан Мицкоски преку социјалните мрежи информираше дека Владата започнала серија разговори со претставниците на трговскиот сектор со цел да се спречи дополнителен раст на цените и да се задржи инфлацијата на ниско ниво.
Како што соопшти Мицкоски, во текот на вчерашниот ден била одржана работна средба со претставници на најголемите маркети во државата, на која главна тема биле инфлацијата и движењето на цените на основните прехранбени производи.
Тој најави дека во наредниот период ќе се реализираат и средби со добавувачите и производителите, со цел сите засегнати страни заеднички да придонесат годишната инфлација и цените на основните производи во текот на јули да останат под три проценти.
„Владата останува посветена на мерки што го штитат животниот стандард и обезбедуваат поголема сигурност за граѓаните“, порача премиерот Мицкоски.
Од Владата нагласуваат дека преку координирани активности со бизнис-секторот ќе продолжат напорите за зачувување на куповната моќ на граѓаните и одржување на ценовната стабилност.
