Владата ќе продолжи со политиката на субвенционирање на авиолинии и отворање нови дестинации, најави премиерот Христијан Мицкоски, посочувајќи дека целта е Македонија да прерасне во регионален авио-хаб.
Одговарајќи на новинарско прашање, Мицкоски рече дека во изминатите две години биле отворени неколку десетици нови авиолинии, а позитивните резултати веќе се видливи преку значителниот раст на бројот на патници.
„Политиката на субвенционирање на авиолинии и отворање нови продолжува. Отворивме неколку десетици такви линии во изминатите две години и тоа ги дава резултатите. Оваа година очекуваме бројот на патници да достигне до 3,5 милиони“, изјави Мицкоски.
Тој нагласи дека аеродромите во земјава бележат двоцифрен раст, при што скопскиот аеродром во одредени периоди регистрирал и до 30 проценти повеќе патници во споредба со истиот период лани.
Според премиерот, Владата ќе продолжи да ги поддржува авиолиниите за кои постои интерес, со цел да се подобри поврзаноста на земјата со европските и светските дестинации.
„За нас ова е многу важно и како држава планираме да бидеме регионален хаб од каде што граѓаните од регионот ќе можат да се поврзуваат со останатите дестинации во Европа, па и во светот“, рече Мицкоски.
Тој потсети и дека за време на светската енергетска криза, Македонија обезбедувала снабдување со керозин за неколку регионални аеродроми.
„Во услови кога многу држави ги затвораа своите граници, ние од Македонија снабдувавме неколку регионални аеродроми со керозин“, додаде премиерот.
