Државата е многу блиску до конечна одлука самостојно да го реализира проектот „Чебрен и Галиште“, најави премиерот Христијан Мицкоски, посочувајќи дека станува збор за стратешка инвестиција во водната и енергетската иднина на земјата.
Одговарајќи на новинарско прашање за тоа како би се финансирал проектот, чија вредност се проценува на околу 1,5 милијарди евра, Мицкоски рече дека Владата веќе направила пресметки и разгледува можност целиот комплекс на хидроцентрали на реката Црна, над постојната ХЕЦ „Тиквеш“, да се гради како државен проект.
„Имаше многу неуспешни тендери, обиди за приватни партнерства и процеси проследени со сомнежи. Веруваме дека треба да се обидеме, народски кажано, да стиснеме заби и сами да го изградиме овој проект“, изјави Мицкоски.
Тој посочи дека се водат разговори за формирање синдикат на меѓународни финансиски институции и дека, доколку тие завршат успешно, веќе следната година би можел да биде поставен камен-темелникот на проектот.
Според премиерот, значењето на Чебрен не се сведува само на производството на електрична енергија. Тој нагласи дека во услови на климатски промени, акумулациите би претставувале важни резервоари за вода, а дополнително би придонеле и за обезбедување наводнување за околу 60.000 хектари земјоделско земјиште во Тиквешкиот Регион.
„Ова е амбициозна најава, но не е невозможна. Многу сме блиску до конечна одлука самата држава да го гради овој проект“, порача Мицкоски.
