Владата во Унгарија отвори истрага за кредитот што ѝ беше одобрен на Македонија

Унгарската влада покрена истрага за кредитот од една милијарда евра што претходната влада на Виктор Орбан ѝ го одобри на Македонија преку државната банка „Ексимбанк“, пренесува „Ројтерс“.

Премиерот Петер Маѓар изјави дека заемот, одобрен со каматна стапка од 3,25 проценти и целосно обезбеден со државна гаранција, е една од неколкуте трансакции на „Ексимбанк“ што во моментов се предмет на проверка.

— реклама —

Маѓар, кој по априлските избори ја презеде власта по 16-годишното владеење на Виктор Орбан, најави борба против корупцијата и преиспитување на работењето на претходната влада.

— реклама —

Според него, постои сомнеж дека средствата наменети за поддршка на унгарските компании биле искористени за зајакнување на политички сојузник во странство и можеби за фаворизирање компании блиски до претходната власт.

Македонскиот премиер Христијан Мицкоски, лидер на ВМРО-ДПМНЕ и политички сојузник на Орбан, во 2024 година соопшти дека обезбедил кредит од Унгарија.

— реклама —

Маѓар изјави дека Министерството за економија и енергетика до полицијата пријавило четири случаи поврзани со „Ексимбанк“, меѓу кои е и кредитот за Македонија, поради сомнежи за злоупотреба на службената положба, несовесно работење и други можни кривични дела.

— реклама —

„Владата не сака и нема однапред да донесе пресуда во овие случаи, но ќе ја обезбеди сета потребна поддршка за да се утврди дали се сторени кривични дела“, изјави Маѓар.

Во меѓувреме, унгарската влада до парламентот достави предлог-закон за формирање канцеларија за борба против корупцијата, а Европската комисија објави дека Унгарија ќе се приклучи на Канцеларијата на европскиот јавен обвинител.