Премиерот и лидер на ВМРО-ДПМНЕ, Христијан Мицкоски, најави зголемување на владиното мнозинство со уште една партија од опозицијата, Турската демократска партија, која има еден пратеник во Собранието.
„Ќе ги информирам членовите на Извршниот комитет дека во полн ек се преговорите со Турската демократска партија да биде дел од владината коалиција, односно да бидам уште подиректен, да биде дел од коалицијата којашто ја предводи ВМРО-ДПМНЕ како најголем партнер во рамките на владината коалиција“, рече премиерот Мицкоски во интервју за Телма.
Тој нагласи дека со приклучувањето на ТДП, владиното мнозинство се зголемува со уште еден пратеник кој претходно беше во опозицијата во рамките на Европскиот фронт.
„Очекувам овие разговори да завршат успешно, разговараме за подолг период, за период којшто би завршил со завршувањето на локалните избори во 2029 година. Така што, принципиелно на овој начин би се формирал новиот владин кабинет. Во прва фаза би имале некаде смени, во зависност како ќе се завршат преговорите со ТДП, така ќе имаме дополнително уште еден член во рамките на владината коалиција. Потпретседател за добро владеење нема веќе да има како ресор во рамките на Владата, туку тоа портфолио директно ќе биде под ингеренциите на претседателот на Владата“, изјави премиерот Мицкоски.
