СДСМ преку соопштение обвини дека по епидемијата предизвикана од загадената вода во Гостивар, надлежните институции сега и официјално признаваат дека постои ризик од појава на хепатит А и Е, како и од други заразни заболувања.
Од опозициската партија велат дека токму на ова предупредил проф. д-р Венко Филипче уште минатата недела, оценувајќи дека институциите задоцниле со реакцијата и не презеле навремени мерки додека, како што тврдат, граѓаните користеле загадена вода.
Според СДСМ, јавноста сè уште нема добиено официјален и потпишан извештај за анализите на таканаречената „техничка вода“ во Гостивар. Од партијата бараат да се објави кој ги изработил анализите, кој го одобрил извештајот и врз основа на кои параметри било утврдено дека водата е безбедна.
СДСМ повика итно да се спроведат анализи на водата во сите населени места во Македонија, а резултатите целосно да бидат објавени пред јавноста.
Воедно, партијата смета дека за случајот во Гостивар треба да има не само политичка, туку и кривична одговорност и побара одговорност од министерот за здравство Сашо Клековски, директорката на Државниот санитарен и здравствен инспекторат Ирина Андоновска, директорите на локалните центри за јавно здравје и сите, како што наведуваат, кои знаеле за состојбата, а не презеле соодветни мерки.
