ВЛЕН за истрагата против Груби: Не треба политиката да одлучува кој е виновен, ако нема докази не треба да му судат

Владата не треба да се меша во постапката против поранешниот вицепремиер Артан Груби, а доколку Обвинителството располага со докази дека го прекршил законот, треба да покрене обвинение, порача портпаролот на ВЛЕН, Дритон Сулејмани.

— реклама —

„Сметаме дека Владата не треба да се меша во работата на Обвинителството и судството. Ако навистина постојат аргументи дека тој го прекршил законот, тогаш Обвинителството треба да покрене обвинение. Ако недостигаат факти и аргументи, не треба никој да биде неправедно суден. Да ја оставиме работата на Обвинителството и судството и да го почекаме нивниот исход“, рече Сулејмани.

Груби е осомничен во истрагата поврзана со Државна лотарија, а еден од клучните моменти што му се ставаат на товар е поврзан со владина седница со која тој претседавал и на чиј дневен ред била ставена точка поврзана со набавките во Лотарија.

— реклама —

Прашањето за неговата индивидуална кривична одговорност дополнително се отвора поради фактот што станува збор за одлука на Владата, која не ја носи самостојно претседавачот на седницата, туку Владата како колективен орган, преку гласање на нејзините членови.
Токму на овој аспект претходно се осврна и поранешниот државен јавен обвинител Љупчо Коцевски. Во телевизиско гостување, говорејќи за можната одговорност за одлуки донесени на владина седница, Коцевски посочи дека кога одлуката се носи со гласање на Владата како колективен орган, не може одговорноста да се сведе само на еден член кој учествувал или претседавал со седницата.

— реклама —

Во истрагата, покрај Груби, осомничен е и поранешниот генерален директор и претседател на Управниот одбор на Државна лотарија, Прпарим Бајрами.
Груби ја напушти Македонија непосредно пред отворањето на истрагата и повеќе од една година беше надвор од земјата, по што доброволно се врати. По враќањето му беше определен куќен притвор. Според досегашните информации на „Скопје1“, тој извршил увид во списите на предметот.

Обвинителството досега не соопшти дали истрагата ќе резултира со обвинение. Во одговор до „Скопје1“ оттаму претходно посочија дека јавниот обвинител постапува во предметот, имајќи ги предвид законските рокови и определените мерки за обезбедување, и дека јавноста ќе биде известена по донесувањето јавнообвинителска одлука.

— реклама —

Мерките за обезбедување присуство на Груби завршуваат на 22-ри месецов, а ако не се покрене обвинение, тој ќе биде слободен граѓанин. Овие мерки се за тој да биде достапен на органите на прогонот и да не влијае врз постапката.