ВМРО-ДПМНЕ ги отфрли обвинувањата на СДСМ дека премиерот Христијан Мицкоски „под радарот“ на јавноста договара бизниси поврзани со центри за податоци, барајќи од опозициската партија да достави докази за своите тврдења.
Од ВМРО-ДПМНЕ велат дека на прашањето на СДСМ дали Мицкоски договара бизниси за центри за податоци без знаење на јавноста, одговорот е негативен.
„Бидејќи секогаш товарот за докажување на тврдењето е на тој што го објавува, јавно го повикуваме СДСМ да достави докази за тоа што го тврдат“, наведуваат од ВМРО-ДПМНЕ.
Од партијата додаваат дека ваквите тврдења не треба да се изнесуваат во форма на прашања, туку, доколку СДСМ има сознанија за незаконско постапување, треба да ги поткрепи со докази.
Во реакцијата ВМРО-ДПМНЕ упатува критики и кон лидерот на СДСМ, Венко Филипче, правејќи споредба со наводи за поткуп поврзан со медицински услуги. Од партијата нагласуваат дека за таквите наводи немаат докази и затоа, како што велат, нема да се однесуваат неодговорно како СДСМ.
