ВМРО-ДПМНЕ: Нови инвестиции во Кочани - Дом за стари лица, реконструкција на булевар и стипендии за студенти

Општина Кочани во изминатите 11 месеци реализирала и започнала повеќе проекти во инфраструктурата, социјалната заштита и поддршката на младите, информираат од ВМРО-ДПМНЕ.

Меѓу позначајните инвестиции е реконструкцијата на булеварот „Теодосија Паунов“, во должина од 1.040 метри, за која се издвоени 88 милиони денари. Од оваа сума, 85 милиони денари се обезбедени од Министерството за транспорт.

— реклама —

Досега се изведени атмосферската канализација, тротоарот и велосипедската патека, а поставен е и завршниот асфалтен слој на едната коловозна лента.

— реклама —

Во Кочани започнала и изградбата на дом за стари лица, проект чија вкупна вредност изнесува околу 247 милиони денари. Од нив, државата учествува со 200 милиони денари, додека Општина Кочани обезбедува околу 47 милиони денари.

Со изградбата на објектот се очекува да се создадат подобри услови за згрижување на повозрасните граѓани и за обезбедување достоинствен живот во староста.

— реклама —

Поддршката за младите е уште еден од приоритетите на локалната самоуправа. За академската 2025/2026 година доделени се стипендии за 31 студент, во износ од 4.000 денари месечно во период од 10 месеци.

Дополнително, за спортските клубови и младите спортисти се обезбедени повеќе од 7 милиони денари, со цел поддршка на спортските активности и развојот на младите таленти.

Од ВМРО-ДПМНЕ посочуваат дека инвестициите во инфраструктурата, социјалните услуги и младите се дел од заложбите за подобрување на условите за живот и отворање нови можности за граѓаните на Кочани.