„ВМРО паѓа, СДСМ расте“ – опозицијата со пресметка по изборите во Брвеница

СДСМ излезе со поинакво толкување на изборните резултати во Брвеница, откако ВМРО-ДПМНЕ прогласи убедлива победа во првиот круг од превремените избори за градоначалник. Според пресметките на Аналитичкиот центар на СДСМ, поддршката за кандидатот на ВМРО-ДПМНЕ се намалила за 13 проценти во споредба со изборите во 2025 година, додека кандидатот на СДСМ освоил 46 проценти повеќе гласови.

Од СДСМ наведуваат дека кандидатот на ВМРО-ДПМНЕ, Стојанчо Радичевски, освоил 2.944 гласа, наспроти 3.388 гласа што кандидатот на партијата ги добил на изборите за градоначалник во 2025 година. Разликата изнесува 444 гласа помалку, односно намалување од приближно 13 проценти.

— реклама —

Според партијата, падот на поддршката за ВМРО-ДПМНЕ е уште поголем доколку се земе предвид дека на овие избори Радичевски ја имал и поддршката од ЗНАМ и Левица.

„Падот на ВМРО е уште поголем, над 20%, ако се има предвид дека и ЗНАМ и Левица го поддржаа кандидатот на ВМРО“, соопштија од СДСМ.

— реклама —

Во однос на сопствениот резултат, од партијата наведуваат дека во 2025 година нивниот кандидат за градоначалник освоил 481 глас, додека на денешните избори кандидатот Јовица Радески добил 706 гласа. Тоа се 225 гласа повеќе, односно раст од приближно 46,8 проценти.

— реклама —

„Резултатите во Брвеница го потврдуваат трендот дека поддршката за ВМРО се намалува, а довербата во СДСМ расте“, оценуваат од опозициската партија.

Ваквото толкување доаѓа по изјавата на премиерот Христијан Мицкоски, кој прогласи победа на ВМРО-ДПМНЕ и истакна дека разликата во однос на СДСМ е поголема од четири спрема еден. Тој соопшти дека кандидатот на ВМРО-ДПМНЕ освоил околу 3.000 гласови, кандидатот на ДУИ нешто повеќе од 2.100, а кандидатот на СДСМ се пласирал на четвртото место.

Така, додека ВМРО-ДПМНЕ го истакнува водството во бројот на освоени гласови на овие избори, СДСМ ја нагласува промената во поддршката во споредба со минатогодишното гласање.

Бројките за споредбата меѓу двата изборни циклуса се преземени од соопштението на СДСМ, а оценката за пад или раст на политичката поддршка е став на партијата.