Во акциска контрола на Охридското Езеро откриени 52 прекршоци, деветмина управувале пловила под дејство на алкохол

Во координирана акциска контрола спроведена вчера на Охридското Езеро, полициски службеници и инспектори констатирале 52 прекршоци, а кај девет лица било утврдено дека управувале пловен објект под дејство на алкохол, соопшти Министерството за внатрешни работи.

— реклама —

Како што информира МВР, акцијата ја реализирале полициски службеници од Полициската станица за граничен надзор „Охридско Езеро“, во соработка со Регионалниот центар за гранични работи Запад и инспектори од Капетанијата на пристаништа – Охрид.

— реклама —

Во рамки на контролите, согласно Законот за внатрешна пловидба, биле проверени вкупно 63 пловни објекти. Кај 31 пловен објект и 31 лице биле евидентирани 52 прекршоци, меѓу кои недостиг на задолжителна опрема, управување необележани и нерегистрирани пловни објекти, пловидба за време на забрана, управување без одобрение за пловидба, превоз на поголем број патници од дозволениот, како и неносење пловидбена дозвола.

При алкотестирањето, кај девет лица било утврдено присуство на алкохол.

— реклама —

Дополнително, кај пет лица кои изнајмувале педалинки била констатирана нецелосна примена на безбедносните правила при нивното изнајмување.

— реклама —

Од МВР најавуваат дека ваквите акциски контроли ќе продолжат и во текот на летната сезона, со цел доследно почитување на Законот за внатрешна пловидба и зголемување на безбедноста на Охридското Езеро.