Хаос на изборите во БиХ: Електронскиот систем создава проблеми низ целата земја

Граѓаните на Босна и Херцеговина денеска гласаат на десеттите општи избори, на кои се избираат претставници на државно, ентитетско и кантонално ниво. Право на глас имаат околу 3,4 милиони граѓани.

— реклама —

Избирачките места беа отворени до 19 часот, а на оние места каде што гласањето започнало со задоцнување или имало прекини, времето за гласање се продолжува за периодот во кој граѓаните не можеле да гласаат.

Според податоците на Централната изборна комисија на БиХ, до 15 часот на редовните избирачки места гласале 916.269 граѓани, односно 26,88 отсто од регистрираните гласачи. Од ЦИК напоменуваат дека во пресекот не се опфатени податоците од сите редовни избирачки места.

— реклама —

Излезноста меѓу гласачите регистрирани за гласање надвор од БиХ до тој период изнесувала 1,11 отсто. Новиот систем за следење на изборниот процес овозможува речиси во реално време да се следи бројот на проверени гласачи.

— реклама —

На овие избори граѓаните избираат тројца членови на Претседателството на БиХ, членови на Претставничкиот дом на Парламентарното собрание на БиХ, претседател и потпретседатели на Република Српска, членови на Народното собрание на Република Српска, членови на Претставничкиот дом на Парламентот на Федерацијата БиХ и членови на кантоналните собранија.

Вкупно се избираат 518 носители на функции од 7.028 сертифицирани кандидати, а на изборите учествуваат голем број политички субјекти.

Овие избори се одржуваат со нови изборни технологии. За првпат се користат уреди за биометриска идентификација на гласачите и скенери за гласачките ливчиња. На дел од избирачките места имало технички проблеми и доцнења поврзани со новата опрема.