Британските власти запленија 2,9 тони кокаин скриен во пратка со банани во пристаништето Лондон Гејтвеј во Есекс, а вредноста на дрогата се проценува на околу 230 милиони евра.
Според британската Национална агенција за криминал (NCA), пратката пристигнала од Јужна Америка, а дрогата била скриена во кутиите со банани. Заплената била извршена во четвртокот од припадници на граничната служба.
Во врска со случајот биле уапсени девет мажи, кои подоцна биле пуштени со кауција.
Од NCA оценуваат дека станува збор за значајна заплена која на организираната криминална група зад пратката ѝ оневозможила огромен профит.
Британските власти потсетуваат дека во февруари 2024 година во пристаништето Саутемптон биле запленети речиси шест тони кокаин, исто така скриен во пратка со банани од Јужна Америка.
Во октомври 2025 година британското Министерство за внатрешни работи соопшти дека во периодот од 1 јуни до 31 август биле запленети рекордни 15,6 тони кокаин, чија вредност била проценета на повеќе од една милијарда евра.
