Во текот на изминатото деноноќие, полициски службеници на територијата на целата држава лишиле од слобода 14 возачи поради безобѕирно управување со моторни возила.
Како што информираат од Министерството за внатрешни работи, 12 од приведените управувале возила без возачка дозвола, меѓу кои и еден малолетник, додека двајца возачи биле затекнати како возат под дејство на алкохол.
Три лица биле приведени во Битола, две во Прилеп, од кои едното е малолетно, две во Скопје и по едно лице во Ропотово, Кичево, гостиварско, Гостивар и Ресен. Кај возачот од Ресен биле измерени 0,92 промили алкохол во крвта.
Под дејство на алкохол биле затекнати и по еден возач во Кратово и Македонска Каменица. Возачот во Кратово претходно предизвикал сообраќајна незгода, откако со возилото удрил во паркирано товарно возило.
Од МВР информираат дека по целосното документирање на случаите ќе бидат поднесени соодветни кривични пријави.
Воедно, од Министерството апелираат до сите учесници во сообраќајот да ги почитуваат сообраќајните правила и прописи и да не управуваат возило без возачка дозвола, доколку им е изречена забрана за управување или доколку се под дејство на алкохол, со цел заеднички да се придонесе за побезбеден сообраќај.
