Министерството за внатрешни работи информира дека по успешно завршеното финално тестирање, во функција се ставени безбедносните камери од системот „Безбеден град“ на автопатската делница меѓу селата Горенци и Требеништа, во општина Дебрца.
Од МВР најавуваат дека во наредниот период системот ќе започне со работа и на сообраќајниците во Охрид и поширокиот регион, каде што камерите веќе се поставени, а во тек е нивната техничка проверка и завршно тестирање.
Со воведувањето на системот „Безбеден град“ се очекува да се обезбеди поефикасен и континуиран сообраќаен надзор, полесно откривање на сообраќајните прекршоци, подобрување на сообраќајната дисциплина и зголемување на безбедноста на патиштата. Според МВР, неговата примена треба да придонесе и за намалување на бројот на сообраќајни незгоди.
Министерството апелира до сите возачи доследно да ги почитуваат сообраќајните правила и прописи и со одговорно однесување да придонесат за побезбедни патишта низ државата.
