Инспекциските служби на Агенцијата за храна и ветеринарство (АХВ) спроведоа 70 вонредни инспекциски надзори во Гостиварскиот регион, при што е утврдено дека операторите со храна ја почитуваат забраната за употреба на водата од градскиот водоснабдителен систем. Истовремено, инспекторите констатирале и повеќе неправилности, поради што се изречени 30 парични казни во вкупен износ од 7.750 евра во денарска противвредност.
Контролите опфатиле продажни објекти, кафе-барови, пицерии, пекарници, слаткарници, сендвичарници, ќебапчилници, производители и пакувачи на овошје и зеленчук, како и други оператори со храна.
Од АХВ информираат дека кај ниту еден од контролираните субјекти не биле утврдени прекршувања на забраната за користење на водата од гостиварскиот водовод. За подготовка и послужување храна, како и за миење на садовите, работните површини и опремата, се користела пакувана или друга безбедна вода, а во угостителските објекти гостите биле послужувани со пластични и хартиени чаши и прибор.
При инспекциите, кај пет оператори било утврдено дека не се спроведени мерки за дезинфекција, дезинсекција и дератизација, кај 18 оператори не биле извршени задолжителните здравствени прегледи на вработените, а биле затекнати и 11 правни лица кои не биле регистрирани како оператори со храна во АХВ. Покрај паричните казни, на овие субјекти им е изречена и привремена забрана за вршење дејност до нивно регистрирање.
Инспекторите откриле и двајца оператори кои пуштиле во промет небезбедна храна. Уништени се вкупно 18 килограми производи, меѓу кои виршли, кисело млеко, јогурт, слајс-салами и путер.
Освен паричните казни, АХВ изрекла и 12 забрани за вршење дејност, опомени и наредби за отстранување на утврдените неправилности.
Од Агенцијата повторно апелираат граѓаните и операторите со храна да продолжат да ја почитуваат забраната за употреба на водата од градскиот водоводен систем во Гостивар сè додека таа е во сила, а сите случаи на непочитување да ги пријавуваат до АХВ.
