Хрватскиот суд условно осудил 43-годишен државјанин на Босна и Херцеговина на 15 дена затвор, откако полицијата во Кореница утврдила дека на социјалните мрежи објавувал содржини со кои го величел осудениот воен злосторник Ратко Младиќ.
Според Полицијата на Личко-сењската жупанија, мажот објавувал фотографии, симболи, песни и текстови со кои јавно изразувал почит и благодарност кон лице осудено за воени злосторства. Со тоа, според полицијата, предизвикал вознемиреност, непријатност и чувство на навреденост кај граѓаните.
По спроведената истрага, тој бил изведен пред надлежниот суд поради прекршок и условно осуден на 15 дена затвор, со едногодишен рок на проверка. Казната ќе биде извршена само доколку во тој период стори ново кривично дело.
Ратко Младиќ, поранешен командант на Војската на Република Српска, бил осуден на доживотен затвор од Меѓународниот кривичен трибунал за поранешна Југославија за геноцид, злосторства против човештвото и кршење на законите и обичаите на војувањето за време на војната во БиХ од 1992 до 1995 година. Младиќ почина во затворот во Хаг на 27 август.
Босанското обвинителство вчера соопшти дека по неговата смрт добило илјадници пријави против лица осомничени за кривично дело „величење на осуден воен злосторник“. Ниту една од пријавите, како што било наведено, не била поднесена од полициска служба.
