Во Конго би можело да има повеќе од 900 заразени со ебола

Светската здравствена организација (СЗО) соопшти дека во Демократска Република Конго моментално се регистрирани 906 сомнителни случаи на ебола, додека се истражуваат и 223 сомнителни смртни случаи поврзани со болеста.

— реклама —

Според податоците на организацијата, продолжува појавата на нови случаи на зараза со сојот Бундибугио, а одреден број инфекции се регистрирани и во соседна Уганда.

Во Демократска Република Конго досега се потврдени 125 случаи на ебола и 17 смртни случаи во провинциите Итури, Северен Киву и Јужен Киву.

— реклама —

Во Уганда, пак, се потврдени седум случаи на зараза, од кои три биле увезени од Конго. Таму е регистриран и еден смртен случај, но засега нема докази за ширење на болеста во локалните заедници.

— реклама —

Од СЗО предупредуваат дека стапката на смртност кај потврдените случаи се движи меѓу 30 и 50 проценти. Анаис Леганд од Тимот за високоризични патогени при програмата на СЗО за итни здравствени ситуации изјави дека тоа значи оти во крајна линија би можеле да починат до пет од десет заразени лица.

Таа нагласи дека податоците сè уште се прелиминарни и дека се потребни дополнителни истражувања, но додаде дека навремената медицинска грижа може значително да ја намали смртноста.

— реклама —

СЗО потсетува дека во моментов нема одобрена вакцина ниту специфична терапија наменета за лекување на болеста предизвикана од вирусот Бундибугио.