Светската здравствена организација (СЗО) соопшти дека во Демократска Република Конго се регистрирани повеќе од 900 сомнителни случаи на ебола, од кои 101 се лабораториски потврдени.
Генералниот директор на СЗО, Тедрос Аданом Гебрејесус, на платформата Икс објави дека бројот на случаи расте како што се засилуваат активностите за надзор и откривање на заразата.
„До денес се идентификувани повеќе од 900 сомнителни случаи, од кои 101 се потврдени“, напиша Гебрејесус.
Министерството за здравство на ДР Конго претходно соопшти дека досега починале 204 лица, од вкупно 867 сомнителни случаи.
Земјата на 15 мај официјално прогласи епидемија на ебола предизвикана од вирусот „Бундибугио“, за кој во моментов нема ниту вакцина, ниту специфичен лек.
Според СЗО, стапката на смртност кај оваа форма на ебола може да достигне и до 50 проценти, поради што организацијата прогласи меѓународна здравствена тревога.
Еболата во изминатите пет децении однесе повеќе од 15.000 животи во Африка, а според податоците на СЗО, смртноста кај различните епидемии се движела од 25 до 90 проценти.
