Во Македонија има четири случаи на маларија, три на денга, еден случај на зика и осум на западнонилска треска

Министерот за здравство, Сашо Клековски, на денешната прес-конференција информираше дека годинава во Македонија се регистрирани четири случаи на маларија, три случаи на денга, еден случај на зика и осум случаи на западнонилска треска, при што упати апел до граѓаните што патуваат во ризични подрачја да ги почитуваат препораките за заштита.

Според него, по две години без регистрирани случаи на маларија, годинава се евидентирани четири, а сите се поврзани со патувања во Африка и регионот на Индискиот Океан, поточно на Малдиви и Занзибар. Трите случаи на денга и единствениот случај на зика, исто така, се поврзани со патување на Малдиви.

— реклама —

Клековски предупреди дека денгата претставува хеморагична треска, зика е особено опасна за бремените жени, а маларијата може да има и смртоносни последици кај потешките форми.

— реклама —

Тој ги повика граѓаните кои патуваат во Африка и во регионот на Индискиот Океан, особено на Малдиви и во Занзибар, навреме да се информираат и да ги следат препораките на Светската здравствена организација за вакцинација и превентивна терапија, кои се достапни во Центарот за јавно здравје – Скопје и во другите надлежни здравствени установи.

Во однос на западнонилската треска, министерот соопшти дека се регистрирани осум случаи, од кои еден е поврзан со патување во Грција, додека за останатите се претпоставува дека се локално стекнати. Најголемиот дел од заболените се лица на возраст меѓу 60 и 70 години.

— реклама —

Тој информираше дека до Државниот санитарен и здравствен инспекторат е издадена насока за контрола на спроведената дезинсекција во општините. Кај седум од регистрираните случаи веќе е спроведена дополнителна дезинсекција во радиус од 200 метри околу местото на живеење, согласно епидемиолошките протоколи.

Клековски посочи и дека од минатата година Институтот за трансфузиона медицина стандардно го тестира секој дарител на крв за западнонилскиот вирус во периодот од април до октомври, со што се спречува можноста за пренос на вирусот преку трансфузија.

На крајот, министерот апелираше до граѓаните да користат средства за заштита од комарци и да бидат особено внимателни при престој во близина на бари, мочуришта и други површини со застоена вода, бидејќи сите четири заболувања се пренесуваат преку убод од комарец.