Премиерот Христијан Мицкоски очекува намалување на цените на горивата веќе од понеделник, доколку продолжи стабилизацијата на светските пазари по најавите за мировен договор на Блискиот Исток.
Одговарајќи на новинарско прашање, Мицкоски изјави дека цената на суровата нафта на референтните берзи моментално се движи околу 80 долари за барел и дека пазарите веќе реагираат на најавите за договор меѓу завојуваните страни во регионот.
„Во принцип, мерките завршија со најавите за постигнатиот договор меѓу САД и Иран. Денеска продолжуваат завршните преговори за финализација на мировниот договор и ценам дека на овој начин пазарот ќе се стабилизира“, рече Мицкоски.
Тој посочи дека и по евентуалното целосно отворање на Ормускиот Теснец, ќе биде потребно време за нормализирање на испораките на нафта, бидејќи танкерите ќе патуваат со недели до своите дестинации.
Премиерот оцени дека кризата постепено се заокружува и дека до крајот на годината цената на нафтата би можела да се движи меѓу 70 и 80 долари за барел.
Според владините пресметки, во понеделник се очекува бензините да поевтинат за околу четири денари по литар, додека цената на дизел-горивото би можела да се намали за околу седум денари по литар.
„Да почекаме Регулаторната комисија во понеделник официјално да ги соопшти бројките“, изјави Мицкоски.
