Во Русија денеска започна тридневното гласање на парламентарните избори, први од почетокот на војната во Украина. Изборите се одржуваат во услови на речиси целосно отсуство на организирана опозиција, додека се очекува владејачката „Единствена Русија“ да ја задржи контролата врз Државната дума, објави АП.
Гласањето ќе трае до недела, а на околу 111 милиони избирачи им е овозможено да гласаат и по електронски пат. Руските власти тридневното гласање го образложуваат со настојувањето да се зголеми излезноста.
Пред почетокот на изборите, претседателот Владимир Путин ги повика граѓаните да гласаат, нагласувајќи дека нивниот избор, според него, ќе покаже дека милиони Руси ги поддржуваат руските војници и дека народот е обединет околу заеднички вредности и однос кон татковината.
„Единствена Русија“ се очекува да ја задржи доминантната позиција во Државната дума, која има 450 пратенички места. Половина од мандатите се распределуваат преку партиски листи, додека другата половина се избира во едномандатни изборни единици.
Покрај владејачката партија, во парламентот се очекува да останат и неколку помали партии од таканаречената „системска опозиција“, кои во клучните прашања главно ги поддржуваат владините политики.
Опозицискиот простор дополнително е ограничен. Либералната партија „Јаблоко“, која јавно се спротивставува на војната, минатиот месец со одлука на Врховниот суд на Русија беше отстранета од гласањето на партиските листи. Нејзини кандидати учествуваат само во неколку десетици едномандатни изборни единици.
Дел од политичарите кои се спротивставуваат на војната се наоѓаат во затвор или ја напуштиле Русија пред почетокот на изборната кампања.
На овие избори за првпат гласаат и жителите на четирите украински региони што Москва ги анектираше по почетокот на инвазијата, како и жителите на Крим. Украинските власти го оценија гласањето на тие територии како нелегално и повикаа странските влади и меѓународните организации да не ги признаваат изборите.
