Професорката на Универзитетот „Гоце Делчев“ во Штип, Тамара Јованов, јавно побара од надлежните институции да излезат со официјални информации за квалитетот на водата за пиење во градот, откако, како што наведува, се зголемил бројот на граѓани, особено деца, со стомачни тегоби.
Јованов тврди дека во Штип има голем број случаи на стомачен вирус, но дека досега нема јасна информација од Општината дали состојбата е на кој било начин поврзана со водата за пиење.
„Во Штип скоро секоја втора куќа е со стомачен вирус, а надлежните не најдоа за сходно да објават дали е или не е поврзано со водата за пиење“, наведува таа.
Според неа, по случувањата со водата во Гостивар, Општина Штип досега не објавила официјални податоци за исправноста на водата што ја користат граѓаните.
Јованов посочува дека добива различни, неофицијални информации за состојбата. Од една страна, како што вели, ѝ било кажано дека водата е исправна за пиење, додека од друга страна добила спротивни информации.
„Општината е должна да ги информира граѓаните за вакви важни прашања поврзани со здравјето и животот“, вели професорката, нагласувајќи дека Штип е и универзитетски град во кој секојдневно престојуваат илјадници студенти.
Таа бара од надлежните да објават официјално соопштение и да одговорат дали водата за пиење е безбедна.
„Зошто нема официјално соопштение? Дали нешто се крие или едноставно на власта не ѝ е гајле до степен каде не сака ни да нè информира?“, прашува Јованов.
Во нејзината објава таа ги критикува и службите задолжени за информирање на јавноста, оценувајќи дека граѓаните заслужуваат навремени и проверени информации, особено кога станува збор за прашања поврзани со јавното здравје.
