Две лица од Скопје биле лишени од слобода откако полицијата во нивното возило пронашла поголема количина разновидна стока без соодветна документација.
Како што информираат од Министерството за внатрешни работи, на 22 јуни околу 22:50 часот на улицата „Јадранска магистрала“ во Скопје, полициски службеници од Мобилната единица за компензаторни мерки, во содејство со полициски службеници од Полициското одделение Мирковци, извршиле контрола на патничко возило „Форд“ со скопски регистарски ознаки, управувано од М.И. (19) од Скопје.
При контролата било утврдено дека во возилото се превезувале околу 90 пратки со различни производи, спакувани во црни кеси, за кои не била приложена соодветна документација.
Дополнително, полицијата констатирала дека возачот не поседувал важечка возачка дозвола од Б категорија.
Како сопственик на возилото бил затекнат Е.Ш. (20) од Скопје, по што двете лица биле приведени и задржани во полициска станица за понатамошна постапка.
Од МВР информираат дека против М.И. ќе биде поднесена кривична пријава по член 297-а став 2 од Кривичниот законик поради управување возило без важечка возачка дозвола.
