Словенечката полиција уапси 39-годишен државјанин на Босна и Херцеговина, кој е осомничен дека со нож ја убил својата 36-годишна партнерка во населбата Вухред. Осомничениот бил пронајден непосредно пред полноќ во близина на местото на злосторството и не пружал отпор при апсењето.
Од Полициската управа во Цеље соопштија дека по завршувањето на истрагата ќе биде изведен пред истражен судија под сомнение дека сторил кривично дело убиство.
Според полицијата, злосторството се случило во ноќта кон понеделник во станбена зграда во центарот на Вухред. Жената починала на местото на настанот откако ѝ биле нанесени тешки повреди со нож, а осомничениот избегал пеш.
Полицијата била известена за случајот откако братот на осомничениот го однел неговиот малолетен син во Здравствениот дом во Радље об Драви. Детето, по враќањето дома, ја пронашло својата мајка без знаци на живот, по што го повикало својот чичко. Подоцна било згрижено од надлежните служби за социјална заштита.
Во потрагата по осомничениот учествувале околу 30 полицајци и криминалисти, службени кучиња, коњичка единица, беспилотни летала и полициски хеликоптер. За неговото бегство биле известени и безбедносните служби на Хрватска и Австрија.
Мотивот за убиството засега не е познат. Полицијата соопшти дека претходно не интервенирала во ова семејство и дека осомничениот не бил евидентиран за кривични дела, освен за еден сообраќаен прекршок. Според информациите со кои располага полицијата, во последниот период тој бил во психички нестабилна состојба.
Словенечките медиуми објавија неофицијални информации за идентитетот на осомничениот и за начинот на извршување на убиството, но полицијата засега не ги потврди тие наводи. Таа официјално соопшти само дека жената починала од тешките повреди нанесени со нож.
