Огромниот пожар што повеќе од две недели беснее во Делиблатската Пескара во Србија доби дополнителна воздушна поддршка, откако денеска во гасењето се вклучи рускиот противпожарен авион „Иљушин Ил-76“. Досега огнената стихија зафатила повеќе од 3.500 хектари шума и вегетација.
Авионот синоќа слетал во Ниш, а денеска започнал да дејствува во координација со хеликоптерската единица на српското Министерство за внатрешни работи. Во еден налет „Иљушин“ може да исфрли до 42 тони вода.
Во гасењето учествуваат и хеликоптери на српското МВР и Армијата, пожарникари и локални служби. Работата им ја отежнуваат големата суша, песочниот и тешко пристапен терен, како и силниот ветер, кој често го менува правецот.
Дополнителен проблем претставува подземното горење на хумусот, поради што огнот повторно се активира и на места каде што претходно изгледало дека е изгаснат.
Според официјалните проценки, пожарот досега зафатил повеќе од 3.500 од вкупно околу 35.000 хектари, колку што опфаќа Делиблатската Пескара.
Поради опасноста за луѓето, имотот и животната средина, Кризниот штаб на општина Бела Црква прогласил вонредна состојба во дел од подрачјето во близина на резерватот, вклучително и во Трујино Насеље и селата Кајтасово и Гребенац.
Дел од оградите во ловиштата биле отворени за животните да можат да избегаат од огнената стихија, а биле поставени и дополнителни појилишта.
Делиблатската Пескара, позната и како „европска Сахара“, е најголемото песочно подрачје во Европа. Таа е дом на илјадници животни и повеќе од 900 растителни видови, меѓу кои има и ретки и ендемски видови.
Еден од најголемите пожари во ова подрачје се случил во 1996 година, кога изгореле речиси 7.000 хектари.
