Во Србија од почетокот на сезонското следење до 23 август се регистрирани вкупно 11 случаи на западнонилска треска, соопшти Институтот за јавно здравје на Србија „Д-р Милан Јовановиќ Батут“. Кај 10 од заразените се развила потешка, односно невроинвазивна форма на болеста.
Случаите се потврдени во шест окрузи откако на 1 јуни започнало сезонското следење. Три случаи се регистрирани во Среднобанатскиот округ, додека во Белград, Јужнобанатскиот и Јужнобачкиот округ има по два случаи. По еден случај е евидентиран во Шумадискиот и Западнобачкиот округ.
Просечната возраст на заболените е 66,2 години.
Западнонилската треска годинава е регистрирана и во повеќе други европски земји. Европскиот центар за превенција и контрола на болести (ECDC) минатата недела соопшти дека случаи пријавиле Албанија, Австрија, Франција, Германија, Грција, Италија, Косово, Холандија, Романија и Шпанија.
Вирусот на западен Нил главно се пренесува преку каснување од заразени комарци, при што птиците се важен дел од природниот циклус на вирусот. Не се пренесува директно од човек на човек.
По период на инкубација од два до 14 дена, кај околу 70 до 80 отсто од заразените инфекцијата поминува без симптоми. Кај околу 20 до 30 отсто се развива полесна форма на болеста, позната како западнонилска треска.
Симптомите може да личат на грип и вклучуваат покачена телесна температура, главоболка, болки во мускулите и зглобовите и дигестивни тегоби, а кај дел од заболените може да се појави и осип. Полесната форма најчесто трае од два до пет дена.
Потешката форма се развива кај помалку од еден отсто од заразените и го зафаќа централниот нервен систем. Во такви случаи може да дојде до воспаление на мозочните обвивки или на мозокот.
