Во време на СДС пропадна Еуростандард, а нивната министерка 5 дена порано ги извади своите пари, велат од ВМРО-ДПМНЕ по нападите од СДСМ

ВМРО-ДПМНЕ го врати во јавноста случајот со пропаѓањето на Еуростандард банка во 2020 година, обвинувајќи ја поранешната министерка за финансии Нина Ангеловска дека ги повлекла своите 250.000 евра само пет дена пред банката да ја изгуби дозволата за работа. Реакцијата доаѓа во период кога Народната банка воведе привремена администрација во Алта банка АД Битола.

„Во време на СДС пропадна Еуростандард, а нивната министерка пет дена порано ги извади своите пари додека тие на граѓаните отидоа заедно со банката“, порачуваат од ВМРО-ДПМНЕ.

— реклама —

Од партијата тврдат дека Ангеловска, како тогашна министерка за финансии, располагала со информации што ѝ биле достапни поради функцијата и дека наместо да ги штити интересите на штедачите, се погрижила да ги заштити сопствените средства.

„Така, располагајќи со информации кои и го дозволуваше позицијата министер за финансии, Ангеловска неколку дена пред да пропадне Еуростандард банка во 2020 година, си ги повлече своите 250 илјади евра, додека заштедите на граѓаните пропаднаа заедно со банката“, се наведува во соопштението.

— реклама —

ВМРО-ДПМНЕ изнесува обвинувања и за начинот на кој Еуростандард банка одобрувала кредити пред одземањето на дозволата за работа. Според партијата, банката подолг период одобрувала ризични кредити без соодветно обезбедување, вклучително и на 29 компании од Струмица, меѓу кои, како што тврдат, имало и фирми блиски до семејството Заеви.

Од партијата обвинуваат дека дел од тие компании не ги враќале кредитите, а тогашната власт не реагирала навреме за да ги заштити интересите на штедачите.

— реклама —

„Сето ова се случувало додека СДС беше на власт и нормално не реагираа навреме и не ги заштитија парите на граѓаните, затоа најголем интерес од тоа имаа фирмите на Заеви и на лица блиски до нив“, тврдат од ВМРО-ДПМНЕ.

Во контекст на актуелните случувања со Алта банка АД Битола, владејачката партија порачува дека банкарскиот систем е стабилен и дека надлежните институции ги преземаат неопходните мерки за заштита на штедачите, инвеститорите и граѓаните.

— реклама —

„Сега државата и надлежните институции се на страна на граѓаните, преземаат соодветни мерки и се грижат за нивниот интерес“, наведуваат од ВМРО-ДПМНЕ.

Еуростандард банка ја изгуби дозволата за основање и работење во август 2020 година, по што беше отворена стечајна постапка.