Воен авион се урна во Германија, едно лице повредено

Воен авион денеска се урна во близина на американската воздухопловна база Шпангдалем во западна Германија, при што, според првичните информации, едно лице е повредено.

Несреќата се случила во областа Ајфел, во покраината Рајнска област-Пфалц. Локалните власти на округот Битбург-Прим потврдија дека на местото биле испратени пожарникари и служби за цивилна заштита.

— реклама —

Засега не се познати причините за падот ниту дополнителни детали за несреќата. Локалните власти соопштија дека во овој момент не можат да дадат информации за текот на настанот.

— реклама —

Американските воздухопловни сили сè уште немаат објавено дополнителни информации. Официјално не е потврдено за каков тип воен авион станува збор ниту што го предизвикало падот. Според неофицијални информации, се урнал авион Ф-16.

Во базата Шпангдалем е стационирана ескадрила со околу 20 борбени авиони Ф-16, која учествува во операциите на американските воздухопловни сили и НАТО ширум светот.

— реклама —

Во октомври 2019 година, американски Ф-16 се урна за време на рутински тренинг-лет во шума кај Цемер-Родт, во близина на базата. Пилотот тогаш се катапултирал и поминал со полесни повреди.

Во базата Шпангдалем работат околу 5.000 воени и цивилни лица, заедно со нивните семејства, а базата вработува и меѓу 700 и 800 германски државјани.

Американските воздухопловни сили се присутни во Шпангдалем од средината на 1950-тите. Заедно со базата Рамштајн кај Кајзерслаутерн, таа е една од најважните американски воени воздухопловни бази во Германија.