Поради големиот пожар кој зафати повеќе од 800 хектари во атарите на Велесница, Подвршка и Велика Каменица, во дел од општина Кладово, во Србија, прогласена е вонредна состојба.
Пожарот во вторникот се проширил од правец на Велесница кон Подвршка и Велика Каменица, а гаснењето дополнително го отежнувале силните и променливи налети на ветерот.
На терен и натаму се ангажирани пожарникарско-спасувачки екипи од Кладово, Бор, Доњи Милановац и Мајданпек, како и механизација и вработени од јавните претпријатија. Во гаснењето и спречувањето на ширењето на огнот помагаат и жителите на загрозените села.
Очекувањата се пожарот да биде локализиран и саниран до крајот на денот, доколку нема нагло влошување на временските услови и силни ветрови.
До граѓаните е упатен апел за крајна внимателност и одговорност, особено да не палат стрништа, ниска вегетација и отпад на отворен простор.
Во селото Ртково, пак, во вторникот околу 23:40 часот бил изгаснат пожар кој зафатил површина од околу 20 хектари. Огнот се проширил од излезот на селото кон локалното фудбалско игралиште, а во гаснењето учествувале три возила на пожарникарско-спасувачката служба и Доброволното противпожарно друштво, со вкупно седум пожарникари.
Од почетокот на август на територијата на општина Кладово се регистрирани 22 пожари на отворен простор, од кои најголем дел биле предизвикани од невнимание и неодговорно однесување.
