Вооружени банди нападнаа конвој во Нигерија, убиени најмалку 20 лица

Најмалку 20 лица загинаа во напад на вооружени банди врз конвој со трговци во нигериската сојузна држава Замфара, на северозападот на земјата. Конвојот патувал кон пазар под воена придружба, а за нападот соопштија нигериски воени претставници.

— реклама —

Според сведоци, нападот се случил во саботата околу 14 часот, кога конвојот бил нападнат на патот кон пазарот Насарава, во областа Букујум, пренесува Ројтерс.

— реклама —

Во нападот загинале четворица војници, тројца полицајци, еден припадник на нигерискиот корпус за цивилна одбрана и 12 цивили.

Северозападниот дел на Нигерија сè почесто е цел на напади од тешко вооружени банди кои ограбуваат села, киднапираат жители за откуп и крадат добиток.

— реклама —

Во друг напад, неодамна извршен во сојузната држава Борно, на североистокот на земјата, загинале најмалку 18 жители кои отишле во шума да собираат дрва за огрев. За нападот се осомничени исламски милитанти поврзани со организацијата Боко Харам.

Некои вооружени групи се обидуваат да воспостават калифат во регионот, додека други се занимаваат со грабежи, киднапирања за откуп и присилно регрутирање. Нивните напади досега одзеле десетици илјади животи и принудиле милиони луѓе да ги напуштат своите домови.