Триесет и двегодишен возач од скопското село Глумово бил лишен од слобода откако полицијата го затекнала како вози со 168 километри на час на делница каде што максимално дозволената брзина е 80 километри на час.
Од Министерството за внатрешни работи информираат дека на 8 јули, околу 18:15 часот, на патот Гостивар–Тетово, кај клучката за селото Камењане, полициски службеници од Полициската станица за безбедност на патниот сообраќај Тетово го запреле патничкото возило „Фолксваген Поло“ со скопски регистарски ознаки, управувано од Б.С. (32).
При контрола и мерење со радар било утврдено дека возачот се движел со брзина од 168 километри на час, на место каде што со сообраќаен знак брзината е ограничена на 80 километри на час.
Возачот бил задржан во полициска станица, а по целосното документирање на случајот против него ќе биде поднесена соодветна пријава, соопшти МВР.
