Во две одделни полициски акции во Тетово и Гостивар, приведени се двајца возачи кои управувале товарни возила без положен возачки испит, информираат од СВР Тетово.
Првиот случај е регистриран на 2 јули околу 16:20 часот на регионалниот пат Лешок–Желино, кај селото Жилче. Полициски службеници од Полициското одделение Јегуновце запреле товарно возило „Ман“ со тетовски регистарски ознаки, управувано од Р.П. (20) од селото Ново Село, Општина Желино. При проверката било утврдено дека тој управувал без положен возачки испит.
Истиот ден, околу 20:40 часот, на улицата „18 Ноември“ во Гостивар, полициски службеници запреле товарно возило „Форд“ со гостиварски регистарски ознаки, управувано од А.Ф. (28) од селото Долна Бањица. И кај него било утврдено дека возел без положен возачки испит.
По наредба на јавен обвинител, двајцата возачи се задржани во полициска станица, а товарните возила им се одземени. По целосното документирање на случаите, против нив ќе бидат поднесени соодветни поднесоци.
