Вработените во јавнообвинителската служба при сите обвинителства предупредуваат дека Предлог-законот за јавнообвинителска служба, во неговата сегашна форма, не претставува вистински реформски исчекор, туку пропуштена можност за суштински промени во јавнообвинителскиот систем.
Во реакцијата тие посочуваат дека особено загрижува фактот што верзијата на законот доставена до Собранието значително отстапува од решенијата подготвени од Работната група, во која учествувале претставници на Јавното обвинителство, надлежните институции, академската заедница и меѓународните партнери.
Според нив, голем дел од предлозите што биле резултат на повеќемесечна работа не се вградени во законскиот текст, без притоа да биде дадено образложение зошто тие решенија биле отфрлени.
Иако законот се претставува како дел од реформските процеси и исполнување на обврските од Реформската агенда, вработените оценуваат дека во него не се препознаваат клучните механизми за зајакнување на самостојноста на Јавното обвинителство и за издвојување на јавнообвинителската служба од системот на јавната администрација.
Во реакцијата се наведува дека предложениот закон ги задржува постојните механизми на зависност во управувањето со човечките ресурси, не нуди решение за недостигот на кадар и не предвидува суштинско подобрување на материјалниот статус на вработените. Дополнително, се посочува дека е задржан и постојниот систем на пресметка на платите.
„Особено загрижува што законот се претставува како значаен реформски исчекор, а при неговата анализа произлегува дека најголемиот дел од одредбите се преземени од постојниот Закон за јавнообвинителска служба, додека измените се ограничени и не обезбедуваат суштински промени во системот“, наведуваат вработените.
Тие предупредуваат дека усвојувањето на вакво законско решение нема да придонесе за зајакнување на институционалните капацитети на Јавното обвинителство, туку ќе ги задржи истите слабости поради кои реформата била иницирана.
Поради тоа, вработените во јавнообвинителската служба ги повикаа пратениците пред конечното усвојување на законот внимателно да ги разгледаат нивните забелешки и да обезбедат законски решенија што навистина ќе придонесат за поголема самостојност, ефикасност и професионализација на јавнообвинителскиот систем.
