Коалицијата ВРЕДИ упати остри критики кон Демократската унија за интеграција (ДУИ), обвинувајќи ја дека ја девалвира албанската политика и работи против интересите на Албанците.
Од ВРЕДИ тврдат дека раководството на ДУИ го блокира Законот за правична застапеност и, според нив, директно дејствува спротивно на еден од основните принципи на Охридскиот рамковен договор.
Во партиското соопштение се наведува дека ДУИ, по 22 години учество во влади со СДСМ и ВМРО-ДПМНЕ, сноси одговорност за, како што велат, лошото претставување на Албанците и за злоупотреби во владеењето.
ВРЕДИ обвинува дека граѓаните повеќе не сакаат да бидат претставувани од политичари кои, според нивните тврдења, злоупотребувале европски средства и не успеале да обезбедат основни услови за живот, како што е безбедна вода за пиење.
Од коалицијата понатаму тврдат дека раководството на ДУИ се обидува да обезбеди политичка заштита за да избегне одговорност за наводни коруптивни дејствија и дека создава лажна слика оти правата на Албанците се загрозени само затоа што партијата не е дел од владејачката коалиција.
Според ВРЕДИ, ваквите постапки претставуваат дејствување во корист на политичките интереси на македонската десница и, како што наведуваат, се спротивни на интересите на албанската политичка кауза.
