ВРЕДИ: ДУИ призна дека не го решиле прашањето со правосудниот испит на албански јазик

Коалицијата ВРЕДИ преку соопштение обвини дека ДУИ ја признала одговорноста за фактот што правосудниот испит со години не можел да се полага на албански јазик, посочувајќи дека тоа произлегува од изјавите на шефицата на пратеничката група на ДУИ, Рина Ајдари.

— реклама —

„Со свои зборови го кажа она што ВРЕДИ го тврди со месеци – дека ДУИ, додека беше на власт, не им давала приоритет ниту на албанскиот јазик, ниту на правосудниот испит“, се наведува во соопштението.

— реклама —

Од ВРЕДИ потсетуваат дека само неколку месеци по донесувањето на Законот за употреба на јазиците, ДУИ го изгласала Законот за правосудниот испит без негово усогласување, со што, според нив, било овозможено испитот да се полага исклучиво на македонски јазик.

— реклама —

„Денес граѓаните јасно го гледаат лицемерието на ДУИ, кога без срам излегува на протести за правосудниот испит. Тоа е потсмев кон Албанците и навреда на интелигенцијата на студентите, бидејќи ДУИ протестира против самата себе“, велат од коалицијата.

ВРЕДИ тврди дека актуелната власт за првпат во историјата на државата овозможува правосудниот испит да се полага и на албански јазик, додавајќи дека имаат „национална одговорност да ги коригираат сите штетни политики и полурешенија што ги оставила 20-годишната власт на Али Ахмети“.